1937

Генрих Ксенофонтович Перевощиков вордскиз 1937-ти
арын 14-ти куарусёнэ Эгра ёросысь Верх-Нязь гуртын.
Чутырь черкогуртысь сизьым классъем школаез
йылпумъяса, Ижкарысь индустриальной техникуме
пырыны малпа вал. Но пыриз Якшур-Бодья педучилищее,
собере Дэбес педучилищее выжоно луиз, сое Г.
Перевощиков 1954-ти арын йылпумъяз. Нош 1960-ти арын
Удмурт пединститутысь история но филология факультетэз
йылпумъяз. Кышнояськиз (кузпалыз Мокрушина Роза
Васильевна, одиг пизы но кык нылзы). 1958-ти арысен
Удмурт радиоын ужаз. 1960-ти арын пиналъёслы «Тодьы
гырлы» книга поттиз. Собере печатлваськизы гражданпублицистической пуштросо очеркъёсын книгаос –
«Кыдазы егитъёс» но «Куашетиз сильтол».
• 1977-ти арын Генрих Перевощиковез Писательёслэн
огазеяськоназы куто. Та арын ик со поттэ «Йыбыртты
музъемлы» книгазэ, кудиз вуоно тетралогилэн нырысети
люкетэз луиз. «Йыбыртты музъемлы» тетралогия борды
кутсконлэн одигез мугез таче но вал: 1970-ти аръёсы
Россиысь калыкъёслэсь литературазэс дунъянын одиг
«гожтымтэ курон» кузёяськиз – вань-а ни отын бадзым
жанрен гожтэм ужъёс, сотэк литература быдэ вуымтэгес на
адскылиз.
Г. Перевощиков возьматиз, удмурт литератураын вань сыче
ужпумъёс но характеръёс, кудъёсыз одиг яке кык романэ
гинэ уг тэро, романъёслэн сузьетазы курисько. 1980-ти арын
потэ тетралогилэн кыкети книгаез – «Югдонын» зардэ»,
собере – «Тулкымлы пумит» (1981) но «Нуназе азьын»
(1986). «Прозаик умой возьматиз, мар со косъяськонприказъяськон (командно-административной) система но
тоталитаризм, мар мугъёсъя социализмо шаерамы ужась
адямиослы шудо улон пуктыны уг луы. Улонмылэсь кыче
палъёссэ гинэ уг усьты Г. Перевощиков, кыче вормон гинэ
колхозын ужасьёс уг басьто, – котькытын кылдо но
возьматисько социализмлэн «вужеро» палъёсыз, адямилы
пумит луись инъетъёсыз» (В. Л. Шибанов).
• В. Емельянов «Йовалег» роман пумысен тазьы гожтиз:
«Мынам малпамея, со (Генрих Перевощиков – П.Ш.)
удмурт литераторъёс полысь нырысез зеч-зеч басьтиськиз
ноку быронтэм, весяк улись темаос борды – ог-огдэ жалян,
ог-огедлы юрттон, адямилык. Созэ но пусйыны кулэ,
писатель романзэ гожтиз «огинтыын лёгаськон» шуоно
вакытлэн буй-буй пушъён аръёсаз...» /Емельянов 1997:
437/. «Йовалег» дилогиын журналист-писатель Роман
Овчинников улон югдурлэсь инъетсэ валаны тырше,
сюлмаське, кызьы калык полын адямилыкез утёно.
Романын аспортэмлыко луэ «сюреслэн» образэз, татын со
адзонэн (рок) герзаське. Генрих Перевощиков астэ ачид
быдтон (суицид) ужпумез но котыр ласянь жутэ.
«Тодьы куака» романын возьматиське выльдиськон вакыт.
Романлэн валтись героез – Николай Ушаков. Со бертэ вордскем
гуртаз афган ож бере, но нокытысь но зэмлыкез-шонерлыкез
шедьтыны уг быгаты. Ас пуштросэзъя Ушаковез «донкихотъёслэн» сузьетазы но пыртыны луэ.
• 1992-ти арын Г. Перевощиков «Кенеш» журналын редактор луыса
ужаны кутске. Даурлэн пумаз, куке улон выль оре пыриз, Г.
Перевощиковлэн дуннешодонэз уката но азьланьтиськиз. Бадзымесь
жанръёслэсь куштиськыса, со пичигес жанръёс борды выже, но
пуштроссыя но жутэм ужпумъёссыя соос эшшо но вылиынгес луо.
«Ыш-ыш-ыш» (1994) повесть лыдзисьёсты «Горбачев вакытысь»
«Ельцин вакытэ» выжытиз. Улонын бадзымесь воштиськонъёс
ортчизы, шаермы пормымтэ социализмысь пормостэм капитализме
зымиз. «Ыш-ыш-ыш» бере сокугес ик «Ӧб-об-об» но «Эх ма-а...»
мадёсъёс потизы, огазьын соос «Сюлэмтэм дунне» нимо трилогия
кылдытизы. Син шоры йотэ: куинез ик повестьлэн нимыз
междометиос пыр сётэмын, озьы автор туала дыре кылдэм югдурлы ас
дунъетсэ сётэ. «Ыш-ыш-ыш» – та междометие возьматэ, макем кезьыт
луиз адямилы дунне вылын (татын ик Нюралэн ульчаын кынмыса
сылэмез), «Ӧб-об-об» – макем вось луиз солы (вылаз ик, кыкез
геройёсмы туж секыт висьыса больницае сюро), нош «Эх-ма-а...» – со
курыт лулзон, зэмлыклэн кужымезлы осконтэмен пычам мылкыд.
Генрих Перевощиков валэктыны тырше, малы туала город
удмуртъёсты мурт каре. Угось асьмеос туала городэ интыяськыны ом
быгатэ ке, соку чуказе нуналмы понна нюръяськыны, бадзым
вожвылъяськонын (конкуренциын) вормыны ум быгатэ. Но
урбанизацилэн мукет кышкытлыкез вань – со удмуртлыкмес котьку
но быдтыны, зучомытыны тырше. Г. Перевощиков чеберлыко
амалъёсын возьматэ, кызьы асьмелэн дуннеямы «зокметъёс»
кылдизы, кыче соослэн психологизы, мар валтэ соосты мукет
адямиосты адзонтэм каронэ. 2000-ти арын «Кенеш» журналын Г.
Перевощиковлэн «Шелеп» повестез печатласькиз. Татын геройёсыз
но мукетэсь ни, югдуръёс но. Озьы ке но, азьвыл гожтэм текстъёсын
трос огкадез вань. Кун премилэн лауреатэз Андрей Соловьев, ас
улоназ трос шуг-секытъёс пыр ортчыса, умой валаз, макем улие
усьыны быгатэ вылэм адями, кыче катъёс табере асьме дуннеын
кузёясько. Со чылкак огназ кылиз – кышнотэк, питэк, квартиратэк.
Мае но адзоно, мае но чидано оз лу улон пыдсы тюам Соловьевлы!
Г. Перевощиковлэн азьло произведениосаз сямен ик, азьпал радэ
потэ «чылкыт сюлэмо адями – шимес дунне» конфликт.
• 2006-ти арын Финляндиысь М. Кастрен нимо огазеяськон
Россиысь финн-угор писательёс полын чошатскон ортчытиз.
Жюри нырысети инты сётиз Г. Перевощиковлэн «Узы сяськаян
вакытэ» повестезлы. Та произведение дунне литератураысь
«улонлы йылпумъян карон» романъёсын (роман подведения
итогов) одиг радэ пуктэмын (Т. И. Зайцева). Повестьлэн валтись
героез – заводысь цехен кивалтись Назаров. Со котьку зэмлык
понна юн-юн нюръяськылиз. Но геройлэн сыче юн,
принципиальной луэмез мукет палыныз берыктиськиз: яратоно
кышноез но, заводысь уллям ужасьёс но туж секыт югдуръёсы
шедё. Секыт висьыны кутскыса, Назаров ортчем улонэз шоры
выль синмын учкыны кутске, улонэз берыктыны луысал на ке, со
троссэ воштысал.
Али Генрих Перевощиков «Кенеш» журналын ужа.