(**********) (1953 * 2008)

Удмурт лулчеберет понна Людмила Дмитриевна кык нимын
тодмо: Айтуганова луыса со пыриз удмурт литература
тодосэ, Кутянова нимын – удмурт кылбуран дуннее. Кыкез
ик ужан оръёсыз синмаськымонэсь но адзем карымонэсь.
Людмила Кутянова Ашальчи Окиен мытэм орез азьланьтэ,
яратондэ, улонысь ас интыдэ утчан малпанъёссэ. Кылбуретаз
со портэм темаосты усьтэ, но ваньмыз соос полэстисько
яратонлы сизем чуръёс борды.
1980-ти аръёс:
Нырысети сборникъёс.

 1971-ти арын Людмила Кутянова Удмурт кун
университетэ дышетскыны пыриз. Нош 1976-ти арын,
дышетсконзэ йылпумъямез бере, Удмуртиысь
писательёслэн союззы дэмла солы поттыны кылбур
бичет. Озьыен, 1980-ти арын «Чагыресь пилемъёс»
нимын Л. Кутяновалэн нырысети бичетэз потиз.
Татын тужгес но быгатыса возьматэмын кышномурт но
пиосмурт кусыпъёс. «Со кусыпъёс, зэмос улонын сямен
ик, та книгаысь лирической геройлэн улоназ но
огшорыесь но капчиесь овол, соос шуген кылдо, юнмало,
трос полэс зугаськемын», – пусъе А. А. Ермолаев та
бичетлэн азькылаз. Со сяна, лирической героиня ас азяз
но, гажанэз азе но пуктэ туж бадзым ужпумъёс, кудъёссэ
соос ваче кулэ быдэстыны.
Тон бадзым, тон укыр бадзым:
Паськытэсь пельпумад пилемъёс шутэтско,
Йырсияд шундылэн сиосыз ватисько,
Пыд улад сьод тэльёс шонасько…
Кылбур бичетын озьы ик нимысьтыз инты басьтэ граждан
лирика. Автор данъяськыса вазиське аслаз даурезлы,
вакытэзлы, шуныт кылъёсын вера аслаз быръем ужан орез
сярысь.
Яратон темаез Людмила Кутянова азьланьтэ «Ваче син» (1986)
бичетаз. Но таяз учыре та тема лыдзисьёслы мукет палыныз
берыктиське: лирической героинялэн яратонэз азьло
герзаськемын ке вал гажанэзлэн мылкыдъёсыныз, «Ваче син»
бичетын яратонэз ыштон яке шедьтон чемгес валчеясько
героинялэн аслаз сямъёсыныз, ужъёсыныз.
Та бичетын секыт тылож аръёсы троссэ чидам
нылкышно но секытлы, куректонлы сётскисьтэм анай
образъёс висъясько. Людмила Кутяновалэн чуръёсаз
шараяське войналэн быдэс улон орез тугам-быдтэмез.
1991-ти ар: «Со аръёс».

1995-ти арозь Людмила Кутянова ужаз Россиысь наукаосъя
академилэн Урал люкетысьтыз историяя, кылъя но литературая
Удмурт институтаз. Со вискын ик заочно дышетскиз Москваысь
Дунне литературая институтлэн аспирантураяз. Дышетсконзэ
йылпумъяса, Л. Айтуганова кык монография поттэ: «Удмуртское
стихосложение: вопросы формирования и развития» (1992) но
«Сюлэмысен кутске кырзан. Николай Байтеряковлэн
кылбуръёсыз» (1998). Со сяна, Николай Байтеряковлэсь портэм
аръёсы потэм кылбуръёссэ огазеяса, кык кылын «Жин азвесь
крезьгурен = Серебряная мелодия» бичет (2003) поттэ. Берло
аръёсы критик луыса «Кенеш» журналын ужаз, огдыре «Вордскем
кыл» журналын тыршиз.
Журналъёсын ужакуз но Людмила Кутянова озьы ик
азьланьтэ кылбур гожъян удыссэ. 1997-ти арын со пизэ
армие келя, та аре ик «Рекрут анайлэн кылан-буранъёсыз»
цикл гожтэ, кудиз аспортэмлыко шодон луиз, малы ке
шуоно пиез Чечняе шедиз. Кык ар чоже (1997–1999) Л.
Кутянова гожтэ на эшшо коня ке кылбур, кытын кисьтэ
пиез сярысь сюлмаськонъёссэ, куректонзэ.
Л. Кутяновалэн кылбуретэзлэсь азинскемзэ (эволюцизэ)
эскерыса, О. Кузнецова но В. Шибанов тазьы гожтизы.
Нырысети «Чагыресь пилемъёс» бичетаз нылкышно дунне
феномен кадь возьматэмын ке но, отысь лирической героиня
туж юн герзаськемын ай воргорон дуннеен (нылмурт понна
пиосмурт «пыкет» луэ): кыкети «Ваче син» книга возьматиз
героинялэсь палэнысь «пыкеттэк», аслаз узыр пуш дуннеез
бордын возиськыны быгатэмзэ. Нош куинети «Со аръёс»
книгаын со ачиз порме «пыкетлы», кудиз борды кыстиське но
возиське пиосмурт.
Людмила Дмитриевна Кутяновалэн портэм удысъёсын
тыршемез «Удмурт Элькунысь лулчеберет удысысь дано ужась»
нимын пусъемын (2001), со луиз Ашальчи Оки нимо премилэн
нырысети лауреатэз.