12. Пӧртмаськись корка

Пӧртмаськись корка
- Анай, атай, марлы? – таче юан йырам берга, нош синкылие бам кузям
ваське. Мылпотытэк мон диськутъёсме сумкае тырисько.
Милям сузереным висъетамы анай лыктиз но киоссэ кусказ пониз.
- Ника, коня пол тыныд вералом на? Ми отчы гужемлы гинэ
мыниськом! – вожез потыса кадь вераз ини анай.
- Гужем каникулъёсме мынам Сьодгуртын уг поты улэме? Куинь
толэзь - мыным быдэс улон кадь ик потэ. Малы тиледлы ваньдылы
квартирамы уг кельшы? Мон татысь нокытчы но ой кошкысал, малпанъёсме верай.
-Юнме вожме поттыса эн улы, укмыс часын машинаын мед луоды, табере ини анайлэн куараез чурыт луиз.
Нош мынам сузэре шоры учкем берам сереме потиз: туж Викалэн
ымнырыз серем адзиське.
- Мар тон синъёстэ быльккетид? – мыняса юай.
- Номыре но эй быльккетылы. Мон, малпаськисько, марлы меда
асьмеос кыктоос вордскими? – куатаськысагес вераз Вика.
Мон ачим но чем таче юан аслым сётисько. Нош валэктон али но уг
шедьтиськы. Соин мар сузэрелы вераны ой вала. Угось ми кыктоос ке но,
вылтусынымы гинэ ог-огмылы укшаськом. Сузэре Виктория Петрова яратэ
кресло вылэ пуксьыны, шобретэн шобырскыса, книга лыдзыны. Школаын со
усто дыщетске но портэм олимпиадосы пыриське, вормисе потэ. Нош мынам
копак дышетскеме уг поты, соин ик чемысь «куиньлэсь» выли оценкаос
басьяме ик овол. Мон спортсменка. Бызьылыны яратисько, тупен шудыны.
- Уг поты, ке, мыным кельшись луэмед… йырсидэ буя! Вожен! – та
кылъёс верам бере, малпаськыны кутски... «Вика школае вуиз, шапказэ
кылиз но портфельзэ кутыса, коридорти мынэ. Нылъёс но пиос сое адзыса,
шыпыт вераськыны кутскизы, кудъёсыз серекъязы. Ваня Дугов сузэрме
йырситиз кыскиз.
- Вож йырсиё! Вумурт! – быдэс школа тыр черектиз но сяласькыса
серекъяны кутскиз со. Дышетскисьёс но Ванялэсь серемзэ кутизы…»
- Эй! Ника, ку-ку! Тон кытын? – киме кутыса кыскиз монэ сузэре,
сайказы зеч малпанъёсы но васьки мон музъем вылэ.
- Мар? – воже потыса юай мон.
- Уг поты мынам вож буяськем! Тон мар, вунэтид-а, мар милемлы со
сярысь биологияын веразы…
Викалэсь супыльтэмзэ мон эй кылзиськы ни. Сумкаме басьтыса, ос
кусып доры бызи. Сузэре, паймыса вуиз мон доры.
- Тон мар-о озьы кошкиськод? Мон тыныд ваньзэ эй вера уг ай, азьланьтиз веранзэ Вика. Нош мон солэсь пал кылзэ но ой ни кылы.
Тани кошкон дыр вуиз. Кыче уг поты кошкеме выль интые.
Кутчаськыса, тубатти васьки, лифтэ пыреме оз поты. Анай но атай
машинаын ини возьмало вал. Тани вырзим тодмотэм интые, тодмотэм гуртэ,
тодмотэм муртъёс доры.
- Коня ми мыном? – юай мон.
- Кык час пала, - шуиз атай.
Нош тодыса кыче каллен атай ветлэ кык час быгатэ куинь но ньыль но
час кыстиськыны. Изем потыны кутскиз но синме кыньыса умме уси.
Сайкай машинамы урод сюрести мыныкуз. Вуимы Сьодгуртэ, кытын сылэ
басьтэм коркамы. Марлы мед-а озьы нималлям? Татын чебер коркаос
ульчаосын сыло. Кудъёсаз капка азязы пересьёс вераськыса пуко. Озьы ке но
мыным гуртлэн нимыз пичи но оз кельшы. Нош ми нюлэс пала мыниськом,
татын коркаос ожытгес ини. Милям берпуметиез. Атай капка азе машиназэ
дугдытиз. Ми потим.
Коркамы копак висъяське мукетъёсызлэсь. Тросэз ини горд кирпичлэсь
яке выль амалъёсын жутэмын ини, нош милям корлэсь. Кема аръёс сылыса
сьодэктэмын ини. Шораз учкыса нокыче но шумпотон мылкыд ик овол.
Укно шоры учкыкум, кин ке но шорам учке кадь потиз. Куалекти. Синме
кыньыса нош ик учки со пала, нокин но ой вал. Мынам эшшо но золгес
квартираям бертэме потиз. Капкаез усьтыса, азбаре пырим. Али гужем, соин
ик турын вож-вож, нош татын нокин но уг ветлы бере, пушнеръёс ик мон
жужда будиллям. Коркаез усьтыса, пырим. Выж пуллэсь лэсьтэмын но
лёгиськеме быдэ зукыртэ. Котырским, кыкети этажысь кык бадзым
висъетъёсыз ми сузэреным басьтим асьмелы, анай-атай ули висъетын
интыяськизы. Анай милемлы сётиз мучоло но ву ведраен. Кутскиз милям
выль коркан утялскон.
Ми сузэреным котькудмы асьмелэсь висъетмес миськиськом, нош анай
нырысети этажысь висъетъёсты, атай потиз азбарысь жуг-жагез турнаны но
кораны.
- Эшъёсы шутэтско, нош мон - ужасько. Кинлы ке верай ке сереме
уськытозы, - вучкетисько мон.
- Юнме эн вераськы, тон утялтиськон аслэсьтыд ик коркадэ. Анай-атай
асьме понна гуртэ корка басьтизы, чылкыт омырен мед шокаломы шуыса,
узы-борылы мед ветломы, шур дуре пыласькыны. Кыче татын шулдыр, Викалы татын туж кельшиз. Мон пумит номыр ой ни вера. Мар табере карод
на, чидано.
Ваньзэ миським, утялтим, анайлы но юрттыса вуттим на. Пырыса гинэ
мон вутти аслам висъетам, олокытысь-оломар шкаф вылысь сяська пуктон
усиз. Мон калекти. Собере шкафлэн осъёсыз усьтиськизы зукыртыса. Кыче
ке но кышкемыт куараос но кылисько кадь… Пыдъёсам зыгары ик быриз,
кыче мон спортсменка, куке интыысьтым вырземе но уг луы. Нош кытын зол
куарае - кеськисько кадь, ачим гинэ но куараме уг кылыськы. Коня мон сыли
тазьы уг тодиськы, висъетам аляк шуыса Вика пыриз. Ос усьтыськыса гинэ
вуттиз, ваньмыз чал-чал луиз.
- Вика, мыным кышкыт татын, - дырекъяса верай мон.
- Мар тон шузиаськиськод? – вожез потыса шорам кеськиз ини Вика.
- Кыче татын шузиаськон? Шкафлэн осъёсыз усьясько, шимес куараен
кин ке но кесяьске! – шыпыт верай.
- Нош ик-а тон? Коть мар шу, мон анаен-атаен тыныд уг оскы, - вожез
потыса вераз сузэре.
- Учкы, алдаськисько-а мон уг-а.
- Ника, шкафед ворсамын, - вераз Вика.
Учкисько но мар вераны ик паймисько. Шкаф ворсамын!
- Вика, мон тонэ ой алда вал, - кышкаса верай, - со мон азьын ик
усьтиськиз!
- Тырмоз! – черектиз сузэре. – Акыльтид ини тон! Таиз солы уг
кельшы, соиз!
Мон жожомытски Вика вылэ. Улэ васьки.
- Анай! Атай! Ти кытын-о? – черекти мон быдэс корка тыр.
- Мар луиз? – поранниысь потиз анае.
- Нош атай кытын?
- Сумказэ диськутъёсыныз утча, вунэтэм кытчы понэмзэ. Тубат доры
кельтэм, пе, вал. Мон но адзи ук! Кепказэ басьтыны турттэ вылэм, нош
сумкаез овол! – киосыныз шонаса, вера анай, - Ти од адзелэ-а?
- Ом, - йырмес шонамы.
Анае утялскыса жадем ини, нош эшшо татын диськутъёсмы ышизы на.
Мон золгес кышканы кутски. Учкелэ ай бон: та коркамы мукетъёсызлэсь
кудёкын, нюлэс палан сылэ, укное учкыкум, кинэ ке но адзи, висъетам сяська
пуктон усиз но шкафысьтыс осъёс усьтиськизы. Эшшо на атайлэн сумкаез
ышиз!
- Света, од шедьты-а? – корка пырыса атай юаз.
- Ой, - киоссыныз шонтиз анай.
- Кытчы мед-а со луиз? Мон сое пони но ой иса ни, - ас понназ вераське
атай. – Нош…
- Нылъёсмы оз басьтэлэ, - тодыса ни, мар куспалыз юалоз, шуиз анай.
- Ойдолэ татысь кошкоме, - шыпыт верай мон.
- Марлы? Сумка сюроз ай, ачим кытчы ке но интыяй, дыр. Тон учкы ай,
кыче шулдыр татын. Нокыче кунгожысь шутэтскон интыос кулэ овол –
лякыт вераз атай. – Тон али жадид. Нош чуказе мукет сямен ини вераськод.
Ма тани ук сумкае но. Паймоно кадь, малы мон сое комод вылэ пониськем, йыртэшсэ кормаз атае.
Мынам бордэм потыны кутскиз. Нокин но мон уг кылзиськы!
Бер жытозь коркамы бордын вырим, утялским, диськутъёсмес интыям.
Берло анай туж ческыт картошка пораз, нырысьсэ мон сиськи жок сьорын
азбарын. Мыным пичиен татын кельшыны кутскиз ке но, сюлэм гань-гань ой
вал на. Мар ке но луоз кадь потэ.
- Я, ойдолэ изьыны выдом ни. Жадим туннэ, - вушйыса вераз анай.
Ми сузэреным вылэ тубим но висъетамы пырыса, изьыны выдим.
Нырысь ик, синме кыньыса кылли валес вылын, изем оз луы. Берло кот
вылам но берытски ини. «Ыжъёсты» но лыдъяса вутти, нош изён уг лыкты но
лыкты. Коркан шыпыт но пеймыт ини луиз, озьыен ваньзы умме усизы.
Олокытись – оломар выж зукыртыны кутскиз. Нырысь малпай - Вика.
Султиз, но кышкатыны монэ малпаз. Возьмай. Берло пыри висъетаз но
адзисько – со пыс-пыс изе. Ма мар таче та?! Коня ке гинэ кышкыт овол ни!
Собере тодам вайи – мынам анае-атае вань ук! Кудзы ке но дыр милемыз
эскерыны лыктизы. Умойгес кылзисько - шыпыт, васьки висъет доразы, соос
кемалась соргетыса изё. Мар табере каром? Сайкати, нош ик уз оске,
алдаськиськод гинэ шуозы. Кышкаса синме кыни. Нош со «кин ке но» сьорам
сылэ но секыт шока кадь. Собере ос зукыртиз но ворсаськиз. Шыпыт луиз.
Со «кин ке но» кошкиз. Коня ке вырытэк кылли но бызьыса тубат кузя туби
но валес вылэ выдыса шобрет улэ кариськи. Пельёсме киыным ворсай,
номыре но медам ни кылы шуыса. Кема-а озьы кылли, уг тодиськы, куке но
умме усиськем.
Чукна мон ваньзылэсь азьло сайкай. Кырын югыт ини вал. Вушйылыса
валес вылисьтым султи но улэ васьки ву юыны. Поранние пыри но пайми –
шкафъёс усьтылэмын вал, жок берыктэмын, волдэт вылын пытьыос. Бызьыса
анайлэн но атайлэн висъетазы пыри.
- Султэ! – черекти. – Чаляк!
- Ника, мар тонэн? – синзэ усьтыса, юаз атай.
- Мон отын улын… Ай! Ойдолэ чаляк улэ, поранние. Отын ваньмыз
куямын! – секыт шокаса верай.
- Мар луиз? – Вика лыктиз.
- Ойдолэ ни!
Ваньмы чош поранние пырим. Нош отын... Анай ымзэ усьтиз, атай синзэ
быльккиз, нош Вика мон шоры учкиз.
- Мар со сыче? Кин озьы кариз? – каллен анай юаз.
- Мон тиледлы верай вал ук, татын ваньмыз умой ик овол шуыса! Та
корка портмаськись, валалэ ни ти сое! – валэктыны турттисько мон.
- Ника! Нылы, эн кары ини тон озьы. Гужемзэ татын улом шуыса
кенешим ук, – мур лулзыса шуиз анай.
- Табере тае ваньзэ утялтыны кулэ, - Викалэн котыз жож луиз.
- Малы? Малы ти мыным уд оскиське! – бордыса поти мон кыре.
Коня ке мыныса адзи кыче ке но песянаез, кудиз зус вылын пуке вал.
- Мар тонэн луиз, нылы? Тон та коркан выль улисез-а? – мон шоры
учкыса, юаз со.
Мон дораз пукси но ваньзэ верай.
- Ти та коркан выль адямиос. Нош малы ке но отын улись коркакузё
муртъёсты пичи но уг яраты. Тросэз та коркаез шулдыр интыын
интыяськемын шуыса басьто но коня ке дыр улыса вузало. Ти но тани янгыш
кариды, нош уй колиды ини.
- Песянай, мар тон озьы шуыны турртиськод? - паймыса юасько.
- Мыным та учырез вераз вал ай мынам песятае. Со коркан улэм огназ
кышномурт. Вылымтэ солэн кузпалыз но, нылпиосыз но. Со кышномурт туж
лякыт вылэм, котьку дась котькинлы юрттыны. Тини одиг нунал урод
адямиос малпаллям алдаса пересьлэсь корказэс асьсэлы карыны. Нокин но со
понна, пе, дур уз басьты шуиллям, пиналъёсыз но овол солэн. Нокыче но
кариськытэк дораз улыны куриськиллям, пересь кышномурт соосты жалям,
дораз лэзем. Нош соос, пе, толэзь, кык, ар уло ини. Кошкыны нокытчы но уг
малпасько. Песянайлы номырин но уг юртто, нош нуналлы быдэ сиён куро.
Бератаз диськутзэс но кышъяны-тупатыны пересьлы сётканы кутскиллям.
Нош со куноосыз сярысь зэмзэ но нокинлы но ноку но уродзэ верамтэ,
ултияса воземзы сярысь пал кыл но поттымтэ. Мар косо вал, пе, ваньзэ вуттэ
вылэм. Угось солы туж юрттэ вылэм коркакузёез. Песянайлэн лякытэзлы со
но туж синмаське вылэм. Соин ик котьку юрттэ вылэм, уин трос ужъёссэ
быдэстылэм: пу кора, черсиське, куиське. Ог кылын вераса, портэм ужъёсты
быдэстылэ вылэм. Тани пересь кышномурт лябзыны кутскем ини. Соку
куноосыз малпаллям пересез гуртысьтыз улляны, нош асьсэос бар-бар улыны
та юртын. Таче малпанъёссэс тодэм коркакузё, соин ик юрттыны малпам
пересьлы. Тани жытазе изьыны выдиллям, нош коркакузё йырсиоссэс
тарканы но кысканы кутскем, гекатыны соосты. Быдэс уйзэ тыл жуатыса
потиллям, нокин но изьыны дисьтымтэ ини. Нош чукна песянайлэн куноосыз
дисьёссэз бичаса кошкиллям. Та пала ноку но оз ни вуылэ, - вераз песянай
мыным.
- Озьы ик вань! Со милемыз коркаысьтыз улляны турттэ, - кеськыса кадь
мон шуи.
- Оло озьы но, - мур лулзиз пересь
- Зэмзэ анай-атайлы верай ке, уз оскелэ ук! – нош ик бордэм потыны
кутскиз.
- Нош тиляд кошкемды шат потэ? - паймыса кадь юаз песянай.
- Мынам татчы лыктэме пичи но уг поты вал, нош анай-атайелы но
сузэрелы туж кельше татын. Ма мон но синмаськыны кутски ини вал гуртлэн
шулдырезлы. Нош табере кышкасько мон. Кызьы уйзэ изё, нош гекатыны
кутскиз ке?
- Веранме вераса мон тыныд ой на быдты, - азьланьтэ песянай, Коркакузёлы кельшыны кулэ, соку со тонэн номыр но уз кары. Эшшо ватсаса
вылаз ик котьку тыныд юрттоз.
- Нош мар карыны кулэ?
- Нырысь ик, жок вылады уйлы пуртты ноку но медаз кельтэмын луы.
Соберезэ, туж сак кылзиськы. Кельтэлэ шорем нянь но посьтэлэ юри
коркакузёлы шуыса жук, но жок вылэ понэ, одно ик возаз пуньы понэлэ.
Курегез вандыса посьтыса сие асьтэ семьяеныды гинэ, нош лыоссэ гулбече
ватэлэ, Инмарлэн сэрегаз. Коркакузёдылы кошкыкуды шуэлэ, «Ми
кошкиськом, нош тон коркамез уть», нош бертукуды «Ми бертим, тау,
коркамес утемед понна». Ника, тон валаны кулэ, со табере тынад семьяед
кадь луыны кулэ.
Мон песянайлэн кылъёсыз бере малпаськыны кутски, кызьы солэсь
кошкемзэ ой ни шоды, коня ке пуки на но гуртэ мыни.
- Ника, кытын тон вал? – пырыса гинэ вутти, анай зыгыртиз монэ. Со
берын сыло вал атай но Вика.
- Мыным тиледлы мар ке но вераны кулэ, - шуи мон.
- Ма кыче али вераськон! Жог вылын сиён тонэ возьма ини!
Пыдкутчанме кыльыса, поранние мыни. Анай оз алда. Ваньмы чош жог
сьори пуксим но сиськыны кутским.
- Тау, туж ческыт вал, - мон нырысети поти жог сьорысь.
- Котыд тыриз-а мар-а? – паймиз атай.
- Мыным тиледын вераськыны кулэ.
- Озьыен вера, ми кылзиськом, - чош вазизы.
Мон одиг кылзэ но вунэтытэк семьяелы верай мар пумысен ми вераським
урамын тодмотэм песянаен. Ма нимзэ но ой юа ук? Берло йырам таче малпан
лыктиз. Одно ик юало берло, ас поннам малпай. Анай но атай монэн соглаш
луизы, асьсэлэсь янгышсэз валазы, коркузёез пырем бере ик лиятоно вал,
асьмелэн эшмы, коркамес утисьмы мед луоз шуыса. Анай соку ик бускельёс
доры мыниз но курегзэс коньдонэн басьтиз. Жытазе ми пыжем курег сиим,
нош лыоссэ гулбече ватим. Коркакузёлы шуыса жук позьтим, тусьтые сое
поним но жок вылэ пуктыса уйлы кельтим. Шорем нянь сярысь ом вунэтэ.
- Вождэ эн вай, ми тыныд уродзэ карыны ум малпаське. Милям туж потэ
тон семьямес аслад кадь мед карод шуыса. Аляктыса ми ум улэлэ, эн
кышкаты ни тон милемыз. Ойдо эшъёс луом, - гулбеч доры кариськыса
шуизы анай но атай.
- Нош мон ноку но уг ни кереты, мыным, шонерзэ ке вераса татын туж
кельше ини. Соин ик гужем каникулъёсты татын ортчытэме потэ, - шорам
паймыса учкиз семьяе, нош мон сюлмысьтым верай. Зэмзэ ик мыным татын
кельше.
Анай шумпотыса монэ зыгыртиз, атай йырме маялтиз, сузэре но бордам
зыгырскиз.
Уйзэ кышкасагез ик мон изи. Кин тодэ, оло ми коркакузёлы пичи но ум
кельшиське но уин со милемыз ваньмести гекатоз шуыса. Таче урод
малпанъёсме йырысьтым кошкыны коси, малы ке шуоно, туж оскеме потэ
вал коркакузёлы ми яралом шуыса. Паймоно кадь, нош уйзэ ми ваньмы туж
умой изим, нокин но оз алякты. Нош чукна поранниын туж чылкыт вал.
Коркакузёмы тусьтызэ но, пуньызэ но миськыса кельтэм.
- Озьыен асьмеос татчы кылиськом, - шумпотыса верай мон. Гулбеч доры
лыктыса - Бадзым тау тыныд, коркакузё.
Семьяе мыным паймыса ик сылыса кылиз. Нош мон бызьыса ульчае поти,
мыным тау карыны кулэ вал со пересь кышнолы. Быдэс гуртэс ортчи, нош со
песянаез ой шедьты. Озььы ик, нокин но мынам верамея кышномуртэз оз
тодма. Пайми. Гуртэ мылкыды куашкаса берти. Кыче мынам солы тау кареме
потэ вал, малпай, гужем емыш бичаса солы кузьмало, гуртаз мыныса выж
миськыны юртто. Коня зеч уж лэсьто шуыса малпай, песянай мыным юрттиз
шуыса. Ныры ошиськыса гуртэ пырисько.
- Тон кытын вал? - паймыса юаз атай.
- Песянаез утчай, тау шуэме потэ вал. Ой шедьты.
- Нош учкы ай мар ми шедьтим. Туж вашкала туспуктэмъёс. Ми
малпаськом, татын улись кышномурт но солэн чыжы-выжыосыз, дыр, шуыса.
Нырысь ик туспуктэмез киям кути но тодмай отысь песынайме, кудзэ
быдэс чукна утчай. Ас поннам солы тау кари, нош со туспуктэмысь мыным
мынектиз…