15. Олёш но Марья

Олёш но Марья.
Улэм – вылэм пичи гинэ удмурт гуртын егит пияш Олёш. Со туж визьмо
вылэм. Оло мае но со, пе, тодэ вал. Укыр тунсыко вералляз выжыкылъёсты,
кудъёссэ кылзыса кӧт вӧсь луымон серекъяське, пе, яке туж чус кылзыса
йырсиос ик меӵыр султо вылэм. Вераны кутске ке, котыраз ӝыны гуртоос
люкасько. Вераллям со Нюлэсмурт сярысь но, лякыт Шунды мумы сярысь
но, ӧз вунэтылы Корка куӟеез но. Ваньмызлэсь кышкыт вал веранэз кескич
Вумурт сярысь, кудӥз улэ нюлэс шорысь зынмем тыын но адямиосты дораз
кыскылэ вал. Соин сэрен гуртаос кышкаллязы ты доры матэ но
кариськылыны.
Егитэз но, мӧйыез но яратылӥзы Олёшэз, нош ачиз нокызьы но аслэсьтыз
яратонзэ шедьтыны уг быгаты.
Огпол сӥзьыл нуналэ песянаез доры карысь нуныкаез гуртаны лыктэм. Сычё,
пе, со чебер ныл Марья, кудзэ кылын но уд вера, гожтыны но уд вала. Адӟиз
нылашез Олёш, соку ик синмаськиз. Сокем яратӥз, изьыны но уг быгаты,
сиськыны но уг быгаты ни, ялан Марья син азяз. Нош пумисько ке, сюлмыз
тук-тук гинэ жугиське, вераны кулэ кылъёс уг шедьты, пыдъёсыз но
каньсырало кадь. Ачиз возьдаське Марьялы вань сюлэмзэ усьтыны.
Туж шулдыр нуналэ нылъёс нюлэськы губи октыны люкаськизы. Юмшало
соос нюлэскытӥ, тылобурдоослэсь кырӟамзэс кылзӥсько, губи бичало. Марья
но палэнысь баблес кызьту улысь тӧдьыгуби адӟиз, басьтоно карыськиз.
Нылаш губи сьӧры губи октонняз, чылкак эшъёсызлэсь мукет пала кошкиз но
йыромиз.
«Ау! А-у-у!» - кесяськиз Марья но эшъёсыз сое ӧз кылэ ни.
Куазь но пеймытоме ни. Жадиз нылаш нюлэскыты ветлыса. Мусо чебер
бамаз чонари вотэс лякиськем, быдэс мугорыз пӧсямын, нош сюрэз уката
шуггес но секытгес луэ. Кӧня дыр ортчиз, шуг тодыны, но ветлыса-ветлыса
Марья ты дуре вуиз. Нылаш ӧз но шӧдылы со ты дуре нокычё сюрес но
пытьы но ӧвӧл шуыса. Кышетсэ улвай вылэ поныса, наштаськем бамзэ
миськыны малпаз. Мыкыртскиз но мукет бамлэсь вуысь шораз учкемзэ
адӟиз. Соку ик тодаз лыктӥз Олёшлэн верамез. Марья ӧз но шӧдылы ни,
кызьы сое Вумурт аслаз корказ нуиз. Нылаш валаз, табере со ноку но уз адӟы
ни анай-атайзэ, яратоно эшъёссэ. «Эх, малы меда ӧй оскы мон Олёшлэн
верамезлы», - шуыса бӧрдэ но Вумуртэз сюлворе:
- Вумурт, вождэ ваемысь дугды! Уг медӥськы вал мон тыныд люкетыны.
Лэзь монэ… Туж юн курисько!
- Ярам! Мон уг быдты тонэ но дорад но уг лэзьы. Улод мон дорын. Юрттод
мыным ӧс азьысьтым эбекъёсты улляляны, тэсыраосты корка котырысь
ишкалляны, сиён-люон лэсьтыны.
Кышкаса, кышкаса Марья соглаш луиз Вумуртлы юрттыны.
Нош нылъёс гуртазы бертыса Марьялэн ышемез сярысь ваньмызлы веразы.
Гуртоос уйин нылашез утчаны мыныны кышказы, ӧжыт-а кин шедёз пумитад
нюлыскын сюрес вылын. Олёш гинэ пуке сюлэмшугъяськыса дораз:
- Эх, ыштӥ мон мусо Марьяме! Малы меда ӧй вера яратэмме. Эх, юрттысал
ке кин ке, али ик мынысал утчаны.
Олёшлэсь курекъяськемзэ Корка кузё кылӥз но шуэ:
- Ӟечбур, пияш! Эн курекъяськы. Тон коркадэ умой чылкыт возиськод, монэ
но ӝоже уд уськытӥськы . Со понна мынам тыныд юрттэме потэ. Мон
тодӥсько кытын Марья, нош сюресэд кышкыт но кыдёкын. Улэ нылаш
Вумуртлэн корказ нюлэс шорысь тыын, корказэ утялтэ, синвуосын пылаське.
- Туж бадӟым тау тыныд, Корка кузё! – шуиз Олёш. Мон тодӥсько со тыез.
Тон шонер вераськод, сюрес туж кузь но кышкыт. Марьяез одно ик
Вумуртлэсь мозмытоно.
Котомказэ басьтыса Олёш сюрэс вылэ потӥз. Трос-а, ӧжыт-а мынӥз, бадӟым
нюлэскы вуиз. Вумурт та иворез тодыса Нюлэсмуртлы вазиськоно кариськиз:
- Нюлэсмурт, юртты мыным! Гуртысь пияш Марьяез дораз нуыны лыктэ.
Кышкаты сое, мед сюрессэ ыштоз.
- Ну… озьы ке… - шуэ Нюлэсмурт мылпотытэк – мон тыныд юртто.
Нош Олёш вамышъя нюлэс пушкытӥ, нокызьы но уг ву ты дуре. Писпу
писпуэн ӟыгырскемын, улвай улваен шобырскемын. Пеймыт. Дугд̈из но ас
понназ малпаськыса сылэ: «Ма кин ке юри-а мар-а сюресме ыштыны выре?».
Тодаз лыктӥз, Нюлэсмурт сое озьы нуллэ шуыса.
- Нюлэсмурт! – кеськиз Олёш, - возьматскы! Вера, малы-о тон мыным
люкетӥськод? Улытозям мон номыр тыныд умойтэмзэ ӧй лэсьты. Пу
коракум вождэ эн вай шуылӥ. Гуртоослы но вералляй нюлэсэз но
инкуазьлэсь чеберзэ эскерыса возёно шуыса. Малы-о нош ӟеч лэсьтэм
поннам, мынэсьтым ты доры нуись сюресме ыштыны выриськод?
- Соиз но шонер, - малпаськыса вера Нюлэсмурт, - тодӥсько мон тонэ, Олёш,
тодӥсько. Тон вождэ эн вай мыным. Мон тыныд ты дорозь туж шонер сюрэс
возьмато.
- Тау, Нюлэсмурт! - шумпотӥз Олёш.
- Но огшоры гинэ тон яратондэ Вумуртлэсь таланы уд быгаты. Солы сётоно
луоз сыӵе кузьым, ма понна Вумурт ваньзэ сётыны соглаш луоз.
- Нош кызьы-о мон тодом ма солы сокем кулэ шуыса?
- Сое тодыны юрттоз Музъем мумы. Со быдэс дуннеез тодэ, тыныд но
юрттыны быгатоз.
Вамышъя Олёш тодмо нюлэскытӥ. Тани со азьпалан инвисын ты чилиндолин
ворекъя толэзьлэн пиштэмезъя. Олёш дугдӥз но Музьем мумылы вазиськоно
кариськиз.
- О, Музъем мумы! Кыл мынэсьтым куараме!
Шӧдымтэ шорысь берпалаз куакъёс вырыны кутскизы. Олёш берытскиз но
адӟиз чебер, кузь сьӧд дэремен нылкышноез.
- Монэ ӧтид-а, пияш? – лякытак вазиз кышномурт.
- Ӧти! Туж курисько, юртты мыным, Музъем мумы! Кескич Вумурт лушказ
Марьяме. Тодӥсько, нылашез Вумурт воштоз сыӵе кузьымен, ма понна со
ваньзэ сётыны соглаш, нош ма со – тодӥськод тон гинэ.
-Нош малы Марья тыныд сокем кулэ? Ачид тон таза, муспотон. Гурто
нылъёсты пӧлын но туж трос мусоосыз.
- Ичи ӧвӧл, нош Марья мынам сюлмам лякиськиз, яратӥсько мон сое.
- Ма понна тон солы сокем синмаськид? Мон но егит, чебер. Оло мон доры
кылёд?
-Бен, - соглаш луиз Олёш, - тынад чебередлы инмысь кизилиос но
вожъяськозы, но вала монэ, яратӥсько мон Марьяез. Уг быгаты улыны сое
Вумуртлэсь ӧй ке мозмыты.
- Адӟисько, зэмзэ но тон яратӥськод нылашез. Эскери мон тонэ. Ме тыныд
Вумуртлы кузьым. Кушты сое тыэ. Кузьымед уяса ву вылтӥ кошкыны
кутскиз ке, пегӟе! Сӥзисько тӥледлы азинлык!
- Кызьы тау карыны но уг тодӥськы тыныд, Музъем мумы! – шумпотыса
вераз Олёш но ширтӥз ты пала.
Ты дуре вуыса, шӧдтэк шорысь Вумуртэз адӟиз.
- Нюлэсмурт пӧяз монэ юртто шуыса! Возьмато мон солы! – кесяське
Вумурт, Марьядэ пельдэ кадь ик уд адӟы! Уг сёт!
- Мон малпасько вал визьмо, лякыт тылэн кузёез доры лыктӥ шуыса. Кузьым
ваем вал, кудӥз тыныд туж дуно но кулэ маке, нош мон янгышай. Тон урод
но тырмостэм вылэм! – берытскиз Олёш ты палась.
- Дугды, дугды, пияш! – сюлворе Вумурт, - сёто тыныд Марьядэ, кузьымдэ
гинэ возьмат.
- Кызьы-о мон оском уд пӧя шуыса?
- Эн кошкы! – кеськиз Вумурт, - ваё Марьядэ.
Вумурт зымиз тыэ но Марьяент ӵош берлань потӥз. Марья Олёшез адӟыса
паймиз, аслаз синъёсызлы ик уг оскы.
- Я, мон тыныд ваи, ойдо табере воштом, - чидатэк вите ини Вумурт
кузьымзэ.
- Мон соглаш! – шуиз Олёш но чебер бинетсэ ты шоры сэрпалтӥз.
Нош Марья Олёшен Вумурт кузьымзэ сэрттытозь-пертчытозь кыдёке
пегӟизы, берзы но уг адӟиськы ни вал.
Вумурт пертчиз бинетсе – отын номыре но ӧвӧл! Йыркурэныз быдэс тыысь
ву гинэ жомбыляк-жомбыляк пазяське на вал. Озьы ик кулэ тырмостэмлы.
Егитьёс шумпотэменызы киысь кие кутскыса, вераськыса, серекъяса, огзы
шоры огзы учкыса ӝог гинэ гуртазен вуизы. Ар-а, кык-а ортчыса Марьяен
Олёшен кышнояськизы. Али ке но шудбуро, яратыса уло, нуныкаоссылы
выжыкылъёс мадьыло.