Эрик (Валерий) Батуев (23.09. 1969 – 31. 03. 2002)

*
Валерий Батуев (анай фамилиезъя
Кондратьев) – дано кылбурчи, прозаик,
журналист. Эрик (свобода) – кушемним,
Валерий, Валерик кыллэсь пормытэмын.
Вордиськиз Дэри ёросысь Куштошур
(Семанки) гуртын дышетисьлэн семьяяз.
2002-ти аре тулыслэн кутсконаз Москваын
улон патераз 32 арес дыръяз виемын.
Кызь ныль арес дыръяз Россиысь
гожъясьчиослэн огазеяськоназы пыртэмын,
куке солэн одиг кылбур книгаез но
печатламтэ на вал, «Гольык» бичетсэ гинэ
дася ай вал. Та пумысен егит авторлы
бадзым юрттэт сётиз зуч кылбурчи Римма
Казакова.
Эрик Батуев Психоделик
пуштросъем рок-музыка бордын
ужаз, альбомзэ но поттиз.
Валерик кык толэзь дыръяз ик
атайтэк кылиз. Пияш кыче ке но
аслаз кылдытэм дуннеяз улиз.
Ньыль арес дыръяз вань букваосты тодэ
ни вал, ар ортчыса лыдзиськыны одъяз,
куать арескысен кылбуръёс гожъяны
кутскиз. Школын дышетскыкуз, ассэ
журналистика удысын утчаз,
гожъямъёссэ «Пионерская правда»
газетэ ысъяз; отын сое оз печатлалэ,
«укыр вазь философи ужпумъёс борды
басьтиськид» шуыса, – тодаз вае анаез
Анна Филипповна.
Пияш чем висе вал, дышетсконэзлэсь трос
аръёссэ Сарапул возысь санаторийын
ортчытиз. Отын со зуч школаын дышетскиз,
озьы зуч сямен но, удмурт сямен но чылкыт
вераськыны дышиз .Валералэн артист луэмез
потэ вал, но анаез сое кыдёке кошкыны оз
лэзьы.
Озьы 1984–1987-ти аръёсы Можга веттехникумын ветеринарлы
дышетскиз, практиказэ ас колхозаз ик ортчылиз. Дышетсконзэ
йылпумъяса, дораз бертиз. Армие мынэмезлэсь азьло сое
шоферлы дышетизы, службазэ Хабаровск улосвылын ортчытиз,
руль сьорын, со дыре ик кунгож дурысь пуныос сярысь
сюлмаськоно луылиз. 1991–1996–ти аръёсы МГУ-ысь журналистика
факультетын дышетскиз. Экзаменъёссэ экстернэн сётиз, – одиг
нунал куспын ньыль экзамен! Гожъямъёсыз «Новое время»
газетын чемгес потылизы. Кыкети курсын дыръяз Валераез Л.
Новикова синйылтиз, со дырысен Э. Батуев ас улонзэ «Аргументы
и факты» газетэн герзаз, шуыны луоз. Озьы ик мукет газетъёсын
но журналъёсын («Независимая газета», «Парламентская дума»,
«Московский комсомолец», «Время Московских новостей»,
«Московские новости» но мук.) умой кусыпъёс возиз. «
1996–2001-ти аръёсы аспирантурын дышетскиз,
истори но политологи тодосъёсъя кандидат луон
понна. Диплом ужзэ Чечня сярысь гожтиз. «Сое
нимаз книгаен поттыны чеченъёс куризы вал», –
шуиз Э. Батуев одигаз вераськонын. Пумиськылиз
Дудаевен, Басаевен, Аушевен, Масхадовен,
Кадыровен, оппозициын сылись муртъёсын.
Соослэн кинюртэмзы улсын Россысь газетъёсы выль
материалъёс вайылиз.
Эрик Батуевлэн удысбураз портэм оръёслэнтулкымъёслэн тодметъёссы огазеяськизы:
сюрреализм, постмодернизм, этнофутуризм, реализм
но мук. «Сальвадор Далия» нимо ньыль чуръем
кылбураз со гожтэ:
Гачоло кыллись жадён
Мугорме кыске бордаз.
Пужалтэ синучконзэ,
Тылъёсме котыр кысэ.
Одиг гинэ чуръем кылбураз – «Басьты киосме но
зыгырты астэ» – пычамын юмор но, возьдаськон сям
но, мур драматизм но. «Кылбуроман» нимо кылбурын
«пось укол» метафора пыр туала улонмылэн зугырес
палъёсыз паймымон но мур усьтисько.
Озьы азьпал радэ пото портэм ассоциациос. Гурт
улонлы со матын ке но, огдыре ик туала карез но
портэм палъёсыныз возьматэ (Ижкар, Москва, Рим,
Флоренция). Радъям дунне но аслаз инкуазеныз,
йырчукино дунне но куашкатэм шаер но (Грозный,
Чечня) – ваньмыз татын огинэ вуо. Нимысьтыз
висъяськись тема, кудиз, мон сямен, этнофутуризмен
герзаськемын – со кулон. Эрик Батуевлэн паймымон
трос кылбуръёсыз та ужпумен герзаськемын («Кулонэз
отён блюз», «Кули ке мон…». «Арлыдтэм вужер» но
мук.). Мечак вераны быгатиськом: Э. Батуев шодиз
аслэсьтыз быронзэ.