Список с правой разъезжей грамоты писца Ивана Захарьевича и

Список с правой разъезжей грамоты писца
Ивана Захарьевича и дьяка Сумарока Путятина
старцу Павлу с братией на землю
Печерского монастыря (сельцо Нагавицино),
спорную с поместьем Машкова И.И. (деревня Болкова).
(начало утрачено)
[1511 год, июля 20] [Иван] Иванов сын Машков с Печерского
монастыря архимаритом . . . [вырвано слово «с братиею»]. А в мархимарите
место ил[ь] иной всей брати отвечал старец Павел.
Так рек Иван Машков: «Жалоба ми, господине, на того старца Павла.
Перелезши, господине, у меня за межу, да лес посекли, и землю пашут, и
сено косят силно моей деревни Болковские. А называют, господине, ту
землю манастырскую землею Нагавицинского села. А ту, господине, нам
межю учинил писец Григорей Кренев. И после Григорева писма
манастырские крестяне Нагавицинского села Григорьева грани у меня
посекли, а иные потесали, да иные грани поклали не по тому месту».
И писец Иван Захарич и дияк Суморок Путятин вспросили старца
Павла: «Отвечай».
И Павел старец тако рек: «То, господине, земля, на которой стоите,
манастырская, Нагавицынсково села. А лес, господине, сечем, и землю
пашем, и сено косим свое. А межу, господине, нам учинил Григорей Кренев
не туде, куды Иван вам сказывает. А их, есме, господине, граней не секали,
не тесывали».
И писец Иван Захарьич и дьяк Суморок Путятин вспросили Ивана
Машкова: «Кому то у тобя ведомо, что то земля твоя?».
Иван тако рек: «Коли, господине, писал Григорей Кренев, и он,
господине, учинил межю моей деревне Болкову с манастырским селцом с
Нагавицынским. А с ними, господине были дети боярские Иван да Юри
Луневы, да Митя Игнатов. А та, господине, деревня, за Микитиным отцом за
Игнатом была. Да с ними ж были Великого князя крестьяне: Кирилко
Иванов, да Гридка Брага, да Максимко Семенов. А се, господине, те дети
боярские и крестьяне перед вами.»
И писец Иван Захарьин и дьяк Суморох Путятин вспросили детей
боярских Ивана Лунева с товарыщи, и крестьян Кирилка Иванова с
товарыщи: «Скажите в Божю правду по Великого князя крестному,
целован[и]ю, знаете ли ту землю, на которой стоим и что вам ведомо».
И Митя Игнатов тако рек: «Коли, господине, писал Григорей Кренев, и
он, господине, под моим отцом, под Игнатем, ту деревню Болковскую взял, в
которой н[ы]неча живет Иван Машков. Да дал, господине, ту деревню Ивану
Машкову. И Иван, господине, Машков, тое деревни не взял, и на землю не
поехал, и Григорей, господине, той земле и межу ученил».
А Иван да Юри (окончание страницы) Луневы и крестьяне Кирилко
Иванов с товарыщи тако ркли: «Сказати, господине, Бож[и]я правда по
Великого князя крестному целованию, коли, господине, писал Григорей
Кренев, и он, господине, ту деревню Болковскую у Игната у Митина отца
взял, да дал, господине, ту деревню Ивану Машкову. Да приехал, Господине,
на межу, и Иван, господине, тое деревни не взял, и на межу не поехал.
И Григорей, господине молвыл: «Коли он деревни не возмет, ино то
ведает Князь Великий», да и межю, господине, учинил, и грани поклал. А
поедете, господине, за нами, и мы вам ту межю укажем».
И повели Иван Лунев с товарыщи, а Митя с ними ж, от дуба, на нем
гран, да через дорогу через Троецкую, да лесом, раменем, да на дуб, да став,
тако ркли: «На том, господине, дубе, на обеих сторонах были грани, да
выколоты»; и на дубе на обеих сторонах выколото старо по ивереню А от
дуба привели лесом же к дубовому пни, к вершине, да став, тако ркли: «На
том, господине дубе были грани, да ссечен и свезен. И дуб ссечен да и свезен
тому з год». А от дубового пни - вершиною вниз до болшово врага, да став,
тако ркли: «На праве, господине, земля Великого Князя, Ивановы деревни
Болковские, а налеве, господине, земля манастырская Нагавицинского села.
И как, господине, Григорий Кренев отъехал, и архимарит, господине,
Никандр, о тое ж осени после Григор[ь]я Кренева о Дмитриеве дни прислал
старца Арсения. И старец, господине, Арсеней со крестьны Григор[ь]евы
грани Кренева посекли, а иные выкололи. А поклали по Ивановой земле свои
грани. Занеж, господине, была та земля ни за кем, стояти было за нее не
кому. Да владеют, господине, тою землею и до сех мест».
И писец Иван Захарьич и дьяк Соморок Путятин вспросили старца
Павла: «А у вас кому то ведомо, что то земля манастырская?»
И старец Павел тако рек: «Ведомо то, господине, у нас крестьяном
Офоне Кузмину да Ивашку Бутримову, да Мосейку Оксенову, да Некрасу
Филимонову, да Власку Захарову, да Филке Якушову, что земля
манастырская. А се, господине, те старожилцы перед вами. А межю,
господине, нам учинил с Ывановою деревнею Григорей Кренев. А после
того, господине, ездили писцы - Иван Волынской да Федор Киселев. И оне,
господине, у нас ездили по тем же межам. А спору у нас в той земле не
бывало».
И писец Иван Захарьич и дияк Суморок Путятин вспросили Ивана
Машкова: «Коли ездил писец Иван Волынской, и ты о той земле Ивану
(окончание страницы) бил ли челом?»
Иван тако рек: «Коли, господине, писал Иван Волынской, и яз,
господине, Ивану) бил челом на архимерата на Никандра и на ево крестьян,
что у меня Григоря Кренева межю сорали и грани посекли. И Иван,
господине, ко мне на межю не поехал. И после, господине, Ивана
Волынсково писал Федор Киселев, и яз, господине, Федору на архимерита и
на его крестьян бил же челом, и Федор, господине, мне был, на архимарита, и
пристава дал. И Федор, господине, на земле был, а архимарит, господине,
Никандро, на земле не стал.
И Федор, господине, на архимарита и бранил, а управы мне не ученил.
А те, господине, манастырские крестьяне, тою землею и до сех мест
владеют».
И писец Иван Захарьич и диак Суморок Путятин вспросили старцовых
Павловых старожилцов- Офони Кузмина с товарищы: «скажите в Божю
правду по Великого князя крестному целованю, чья то земля, на которой
стоим»
И Офоня с товарыщи тако ркли: «Сказати, господине, Божя правда, по
Великого князя крестному целованию, то, господине, земля манастырская. А
розъежжал, господине той земле межю с Ывано[во]ю деревнею, з
Болковскою, Григорей Кренев. А поедете, господине, за нами, и мы вам
межю укажем».
И повели от дуба, от Троецкой дороги, а на дубе - гран, да на дуб же на
гран, да на пен на вязовой на гран, да по ямам, да по дубю по гаранем, да
прямо лесом, на пен на горелой. А на нем, сказывают, была гран же. Да на
вражок на пяточину до большово врага, до кузнецовской земли.
Да став, тако ркли: «Ту, господине, им межю Григорей Кренев учинил.
Направе, господине - земля Великого князя Ивановой Болковские деревни, а
налеве, господине, - земля манастырская Нагавицынсково села»
Да манастырские ж крестьяне старожилцы - Офоня с товарыщи - тако
ркли: «Давече, господине, вас Ивановы старожилцы, дети боярские и
крестьяне, Иван Лунев с товарыщи, вели не гораздо по манастырской земле.
А вели, господине, мы вас по правой меже, как им Горгорей Кренев разъехал.
Дайте нам, господине, с ними Божю правду, целовав крест, да лезем с ними
на поле битися».
И писец Иван(окончание страницы) Захарович и диак Суморок
Путятин вспросили Ивана Лунева с товарыщи да крестьян Кирилко Иванова
с товарыщи: «А вы лезете ли с ними на поле битися?»
Иван да Юри Луневы, да Митя Игнатов тако ркли: «Мы, господине, с
ними на поле битися не лезем. А поставят, господине, против нас детей
боярских и мы, господине, против детей боярских на поле битися лезем».
А Кирилко с товарищем тако ркли: «А мы, господине, целовав крест, да
лезем сними на поле битися.»
И по Великого князя слову Васил[и]я Ивановича Всеа Русии, писец
Нова города Нижнего Иван Захарьич, да Великого князя дьяк Суморок
Путятин- в архимаричье место ил[ь] иной и всей брати (окончание
страницы) старца Павла оправили, и землю присудили к их селцу к
Нагавицынскому. А Ивана, Иванова сына, Машкова обвинили, потому, что
Ивановы сторожилцы за поле не имались.
А на суде были у Ива[на] у Захарьича, да у Великого князя диака
Суморока у Путятина: Василей Микифоров, сын Аксаков, да Великого князя
диак дворцовой Иван Горбатой Антонев сын Тимофеева.
К сей правой грамоте писец Иван Захарич да Великого князя диак
Суморок Путятин печати свои приложили. Лета 7019 [т.е. 1511 г.] июля в 20
день окончание страницы
На обороте на скрепах написано: «Список с правой грамоты села
Нагавицына». На последнем столбце на обороте: «Списана при архимарите
Трифане 102 году [т.е. 1594 г.] июля»
Ф. 579. Оп. 589. Д. 1. Л. 1-5.
(Пунктуация дана современная)